قصيدة(حكاية حماده) شعر/خالد أبو العلا المحامى

قصيدة(حكاية حماده)
شعر/خالد أبو العلا المحامى
********************
آسف يا سيدى
مكنشى بإيدى
انّى أتعب سعادتك
قفايا قليلو
جرح إيد سيادتك!!
بوشّى الملخبط
فى كفّك ضربتك!!
وضهرى بوساخته
اللى لطّخ سماحتك!!
تعبتك معايا,,,,,حقيقى تعبتك
ولمّا عاندتك,,يا عينى حرجتك!!
وشمّت كل العدا فى وزارتك!!
وكل الأعادى اللى شافو بيادتك،
وهىّ بتمسح بضهرى فى ساحتك،
عيونهم دى حوله
عقولهم عليله،
ففهمو بمزاجهم
وظلمو عدالتك!!
يا أعدل..يا أنبل
يا أطهر..يا أكمل!!
دا سحلك دوايا
وضربك شفايا!!
لأن الحكايه
ساكنّى ابن جنّى،
مزرجن معايا!!
لازم لجل يخرج ويترك سمايا،
تتنّك تقطّع هدومى..تهينّى،
وتسحل كرامتى
وتلعن عيايا!!
وعارفك يا سيدنا
متقصدشى شخصى،
لأنك رومانسى!!
سليم النوايا!!
بتقصد تذلّ الشيطان اللى فيّا!!
وتقتل فى ثورة كرامتى الشقيّه،
عشااااااااااان استريح!!
واسافر..........أروّح-
سليم مستعافى!!
أهزر وأفرح
وأرجع لدينى!!
وأملك يقينى!!
واسبّ اللى فكّر
يثور لجل يطرح-
وطنّا سنابل كرامه،
وعوافى!!
سامحنى يا سيدى
لأنّى فضحتك!!!!!!